अक्षरा महिला क्रिकेट: सेमिफाइनल समीकरण पूरा
सिमराः बाराको सिमरास्थित सेज क्रिकेट मैदानमा जारी अक्षरा प्रथम अन्तरविद्यालय महिला क्रिकेट प्रतियोगिताको सेमिफाइनल चरणको टुंगो लागेको छ। बिहीबार सम्पन्न लिग चरणका अन्तिम खेलहरूपछि अन्तिम चार टोलीले सेमिफाइनलमा स्थान पक्का गरेका हुन्।
आयोजक अक्षरा पाठशाला, सिमरा पब्लिक इङ्लिस स्कुल (एसपीईएस), पाथीभरा इङ्लिस स्कुल र एक्स सर्भिसम्यान चिल्ड्रेन एकेडेमी सेमिफाइनलमा प्रवेश गरेका छन्। समूह ‘ए’ बाट एसपीईएस र एक्स सर्भिसम्यान, समूह ‘बी’ बाट पाथीभरा, र समूह ‘सी’ बाट आयोजक अक्षराले अन्तिम चारमा स्थान बनाउन सफल भएका हुन्।
सेमिफाइनल अन्तर्गत शुक्रबार पहिलो खेलमा एसपीईएस र पाथीभरा स्कुल आमनेसामने हुनेछन् भने दोस्रो सेमिफाइनलमा आयोजक अक्षरा र एक्स सर्भिसम्यान भिड्नेछन्।
यसअघि बिहीबार सम्पन्न लिग चरणका अन्तिम खेलहरूमा एसपीईएस, एक्स सर्भिसम्यान, र राष्ट्रिय विभूति सामुदायिक शिक्षा सदन विजयी भएका थिए।
एसपीईएसले एकता स्कुललाई ३२ रनले पराजित गरेको थियो भने एक्स सर्भिसम्यानले लोटस एकेडेमीलाई ५ रनले हरायो। यसैगरी प्रतियोगिताबाट बाहिरिसकेको राष्ट्रिय विभूतिले मिसन एकेडेमीलाई ५२ रनले पराजित गरेको थियो।
प्रतियोगिताको फाइनल खेल शनिबार सिमरा स्थित सेज क्रिकेट मैदानमै हुने आयोजकले जानकारी दिएको छ।