दसौं राष्ट्रिय खेलकुद फागुन पहिलो सातादेखि कर्णालीमा
काठमाडौं: यस वर्षको दसौं राष्ट्रिय खेलकुद प्रतियोगिता फागुन १ देखि ७ गतेसम्म कर्णाली प्रदेशमा हुने भएको छ।
राष्ट्रिय खेलकुद परिषद् (राखेप) का अध्यक्ष तथा युवा तथा खेलकुद मन्त्री बब्लु गुप्ताको अध्यक्षतामा बुधवार बसेको १२३औं बोर्ड बैठकले सो निर्णय गरेको हो।
बैठकले नेपाललाई पहिलो अन्तर्राष्ट्रिय पदक दिलाउने पूर्व धावक जितबहादुर केसीलाई २५ लाख रुपैयाँ पुरस्कार दिने सिफारिस मन्त्रिपरिषद्लाई गर्ने निर्णय पनि गरेको छ।
त्यसैगरी, लामो समयदेखि राष्ट्रिय प्रतियोगिता नगरेका खेल संघहरूलाई तीन महिनाभित्र प्रतियोगिता गर्न निर्देशन दिने, खेल संघहरूले घोषणा गरेका सुविधा र पुरस्कार १५ दिनभित्र सम्बन्धित खेलाडीलाई उपलब्ध गराउनुपर्ने तथा वैदेशिक भ्रमणसम्बन्धी प्रतिवेदन राखेपमा पेस गर्नुपर्ने निर्णय बैठकले गरेको छ।
बैठकमा राखेपका सदस्य–सचिव टंकलाल घिसिङले सहजीकरण गरेका थिए। बैठकमा उपाध्यक्ष ध्रुव आचार्य, खेलकुद मन्त्रालयका सचिव डा. हरिप्रसाद लम्साल र अन्य बोर्ड सदस्यहरूको पनि उपस्थिति थियो।