एसीसी प्रिमियर कपको उपाधि जित्दै नेपाल एसिया कपमा छनौट
सिमराः एसीसी प्रिमियर कपको उपाधि जित्दै नेपाल आगामी वर्ष बंगलादेशमा हुने एसिया कपमा छनौट भएको छ । मलेसियाको क्वालालामपुरमा शनिबार सम्पन्न फाइनल खेलमा युएईलाई ४४ रनले पराजित गर्दै नेपालले प्रिमियर कपको उपाधि जितेको हो ।
बायुमास ओभल मैदानमा नेपालले दिएको ३१४ रनको विशाल लक्ष्य पछ्याएको युएई २६९ रनमा समेटियो । युएईका लागि राहुल चोपराले शतकीय पारी खेलेपनि हार टार्न सकेनन् । चोपराले १०५ बलमा एक सय रन बनाए । यसैगरी युएईका सोहेब खानले ५२ रन जोड्दै अर्धशतक पूरा गरे । युएईका ओपनर तनिश सुरीले ४२ र हरप्रित सिंहले ३३ रन बनाए ।
नेपालका करण केसीले तीन, ललित राजवंशी र दीपेन्द्र सिंह ऐरीले दुई/दुई विकेट लिए भने कप्तान सन्दीप लामिछाने, राहित पौडेल र गुलशन झाले एक/एक विकेट हात पारे ।
यसअघि टस जितेर ब्याटिङ रोजेको नेपालले ओपनर आशिफ शेखको शतकीय पारीमा ३१३ रन जोडेको थियो । आशिफले १०६ बलमा चार छक्का र आठ चौका प्रहार गर्दै १०२ रन बनाए । यसैगरी गुलशन झाले ५२ रन जोड्दै अर्धशत बनाए । ओपनर अर्जुन कुमालले ४३, रोहित पौडेलले ४०, दीपेन्द्र सिंह ऐरीले १८ रन बनाउँदा अन्य खेलाडी चल्न सकेनन् ।
युएईका ईब्रार अहमदले चार विकेट चट्काए । यसैगरी खुजैमा तनविरले दुई, हैदर अलि र अदिब उस्मानीले एक/एक विकेट लिए ।
युएईलाई पराजित गर्दै उपाधि जितेको नेपालले अब आगामी वर्ष बंगलादेशमा हुने एसिया कप खेल्नेछ । एसिया कपमा आयोजक राष्ट्र बंगलादेशसहित नेपाल, भारत, पाकिस्तान, श्रीलंका, अफगानिस्तान सहभागी हुनेछन् ।