नेपाल एसीसी प्रिमियर कपको सेमिफाइनलमा, साउदी अरेबिया पाँच विकेटले पराजित
सिमराः एसीसी प्रिमियर कपमा नेपाली टोलीले तेस्रो सफलता हात पारेको छ । मलेसियामा जारी प्रतियोगिता अन्तर्गत आइतबार साउदी अरेबियालाई पाँच विकेटले पराजित गर्दै नेपाल एक खेल बाँकी छँदै सेमिफाइनलमा आफ्नो स्थान सुरक्षित गर्न सफल भएको हो ।
साउदी अरेबियाले प्रस्तुत गरेको १९१ रनको लक्ष्यलाई नेपालले ४१ ओभरमा ५ विकेट गुमाएर सहजै पूरा गर्यो । नेपालको जितमा प्लेयर अफ दि म्याच घोषित गुल्शन झा र कप्तान रोहित पौडेलको अविजित साझेदारी महत्त्वपूर्ण रह्यो । गुल्शनले ४४ रन र रोहितले २४ रनको योगदान दिए ।
यसअघि इशान पान्डेले ४० तथा देव खनालले ३९ रन बनाउँदै टोलीलाई बलियो आधार दिलाएका थिए । त्यसैगरी आसिफ शेखले २० र अर्जुन कुमालले १५ रन जोड्दै जितको यात्रा सहज बनाए । साउदीका तर्फबाट इस्तियाख अहमद र मुहम्मद आतिफले २-२ विकेट तथा मोहम्मद हिशमले एक विकेट लिएका थिए ।
त्यसअघि टस जितेर पहिले ब्याटिङ रोजेको साउदी अरेबियाले ४९.२ ओभरमा आफ्ना सबै विकेट गुमाउँदै १९० रनको योगफल तयार पारेको थियो । साउदीका लागि अब्दुल वाहीदले ७७ रनको उत्कृष्ट अर्धशतकीय पारी खेलेका थिए भने मोहम्मद आतिफले ३० रन र मोहम्मद हिशम शेखले १८ रन जोडेका थिए ।
साउदीका ब्याटरहरूलाई रोक्न नेपाली बलरहरूले निकै किफायती र अनुशासित प्रदर्शन गरे । कप्तान सन्दीप लामिछानेले १० ओभरमा मात्र १९ रन खर्चेर ३ विकेट लिए भने दीपेन्द्रसिंह ऐरीले पनि ३ विकेट हात पारे । त्यस्तै ललित राजवंशीले १० ओभरमा २६ रन दिएर २ विकेट लिए भने शेर मल्लको नाममा एक विकेट रह्यो ।
प्रतियोगितामा यसअघि नै बहराइन र मलेसियालाई हराइसकेको नेपालले अब समूह चरणको अन्तिम खेलमा मंगलबार हङकङको सामना गर्नेछ। उक्त खेलको निर्णयले समूह विजेताको टुङ्गो लगाउनेछ ।