राणाको नेतृत्वमा बन्यो चौथो माउन्ट एभरेष्ट अन्तर्राष्ट्रिय तेक्वान्दो प्रतियोगिताको आयोजक कमिटी
सिमराः नेपाल तेक्वान्दो संघको आयोजनामा हुने ‘चौथो माउन्ट एभरेष्ट अन्तर्राष्ट्रिय तेक्वान्दो प्रतियोगिता’ को तयारी सुरु भएको छ । फाल्गुन १ गतेदेखि ६ गतेसम्म काठमाडौंमा हुने प्रतियोगिताका लागि संघले पूर्वअध्यक्ष प्रकाश शमशेर राणाको नेतृत्वमा आयोजक कमिटी गठन गरेको छ ।
संघको सल्लाहकार समितिका संयोजक समेत रहेका राणाको नेतृत्वमा गठित कमिटीको सहसंयोजकमा उपाध्यक्ष भानुबहादुर चन्द रहेका छन् । चन्द राष्ट्रिय खेलकुद परिषद्को बोर्ड सदस्य हुन् ।
यसैगरी कमिटीको सचिवालय प्रमुखमा साम्राज्य बिक्रम पाण्डे, सचिवमा कुमार लामा घिसिङ, सहसचिवमा बब्लु सिवाकोटी, रहेका छन् । घिसिङ राष्ट्रिय खेलकुद परिषद्को बोर्ड सदस्य हुन् भने सिवकोटी केन्द्रीय सदस्य हुन् । संघले निर्णायक संयोजकको जिम्मेवारी टिकाप्रसाद लिम्बु र प्राविधिक निर्देशकको जिम्मेवारी विदेशी प्रशिक्षक योङ्डाल क्वोनलाई दिएको छ ।
संघले प्रतियोगितामा देशविदेशबाट सहभागी हुन इच्छुक खेलाडीका लागि दर्ता खुल्ला गरेको छ । इच्छुक खेलाडीले क्युरोगीतर्फ प्रति व्यक्ति ८० अमेरिकन डलर शुल्क तिरेर माघ १८ गतेसम्म नाम दर्ता गराउन सक्नेछन् ।