सिमरा पब्लिकलाई ‘प्रथम अक्षरा अन्तरविद्यालय महिला क्रिकेट’ को उपाधि
सिमराः बाराको जीतपुरसिमरा उपमहानगरपालिका ४ स्थित सेज क्रिकेट मैदानमा सम्पन्न ‘प्रथम अक्षरा अन्तरविद्यालय महिला क्रिकेट’ प्रतियोगिताको उपाधि सिमरा पब्लिक इंग्लिस स्कुल (एसपीईएस) ले जितेको छ। आयोजक अक्षरा पाठशालालाई १५ रनले पराजित गर्दै सिमरा पब्लिकले उपाधि हात पारेको हो।
टस जितेर पहिले ब्याटिङ गरेको सिमरा पब्लिकले निर्धारित १० ओभरमा तीन विकेटको क्षतिमा ७१ रन जोड्यो। टिमका लागि रिया श्रेष्ठले २४ रनको उत्कृष्ट योगदान दिँदै अग्रणी भूमिका खेलिन् भने अनुष्का कार्कीले १३ रन जोडिन्। बलिङतर्फ अक्षराकी प्रिन्सा पौडेलले दुई विकेट र सुस्मिता चौधरीले एक विकेट लिइन्।
७२ रनको लक्ष्य पछ्याउँदै मैदानमा उत्रिएको अक्षराले १० ओभरमा तीन विकेट गुमाई ५७ रन मात्र बनाउन सक्यो। अमिश कार्कीले १७ र प्रिन्सा पौडेलले सात रन जोडे पनि अन्य ब्याटरहरू जम्न सकेनन् ।
प्रतियोगिताको सर्वोत्कृष्ट खेलाडी सिमरा पब्लिककी विनिशा लामिछाने घोषित भएकी छिन्। उत्कृष्ट ब्याटरको उपाधि प्रतियोगिता अवधिभर ७३ रन बनाएकी रिया श्रेष्ठले हात पारिन् भने आठ विकेट लिएकी प्रिन्सा पौडेल उत्कृष्ट बलर बनिन् । फाइनल खेलको प्लेयर अफ दि म्याच पनि रिया श्रेष्ठ नै घोषित भइन्।
विजेता तथा उपविजेता टोलीका खेलाडीहरूलाई नेपाल क्रिकेट संघ (क्यान) मधेश प्रदेशका कोषाध्यक्ष सुवास जयसवाल, एन प्याब्सनका केन्द्रीय सदस्य रामप्रसाद अधिकारी, अक्षराका प्रिन्सिपल नरेन्द्र तामाङ, सिमरा पब्लिकका प्रिन्सिपल बसन्त ढकाल, एकताका प्रिन्सिपल मदन रिजाल, पाथीभराका प्रिन्सिपल लक्की रिमाल, सुवास अधिकारी, सिमरा क्रिकेट क्लबका अध्यक्ष पंकज शर्मा र विष्णु लामिछानेलगायतले पुरस्कार वितरण गरेका थिए।