विश्वकप लिग-२ को अन्तिम खेलमा नेपाल यूएईसँग चार विकेटले पराजित

काठमाडौं: आइसीसी विश्वकप लिग-२ अन्तर्गतको अन्तिम खेलमा नेपाल यूएईसँग चार विकेटले पराजित भएको छ। यो हारसँगै नेपालले शृङ्खलामा जितविहीन बनेको छ ।

लिग-२ अन्तर्गतका चारै खेलमा पराजय ब्यहोरेको छ। नेपाल पहिलो खेलमा अमेरिकासँग १०६ रनले, दोस्रो खेलमा यूएईसँग ५ विकेटले, तेस्रो खेलमा अमेरिकासँग ४ विकेटले र अन्तिम खेलमा फेरि यूएईसँग चार विकेटले पराजित भएको हो।

दुबईस्थित आइसीसी एकेडेमीमा बुधबार टस हार्दै ब्याटिङ गरेको नेपालले ५० ओभरमा ९ विकेट गुमाएर २३९ रन बनाएको थियो । २४० रनको लक्ष्य पछ्याएको यूएईले ४९.१ ओभरमा ६ विकेटको क्षतिमा २४३ रन पूरा गर्दै जित हात पार्‍यो।

यूएईका लागि मोहम्मद वसीम र मुहम्मद सहदादले चौथो विकेटका लागि १४७ रनको महत्वपूर्ण साझेदारी गर्दै जितको आधार तयार पारे। सहदादले उत्कृष्ट प्रदर्शन गर्दै १२३ बलमा ६ चौका र ३ छक्कासहित ९६ रन बनाए । वसीमले ७६ रन जोडे ।

नेपालका बलरमध्ये करण केसीले तीन विकेट लिए भने नन्दन यादव, ललित राजवंशी र सन्दीप लामिछानेले एक–एक विकेट हात पारे।

पहिले ब्याटिङ गरेको नेपालका लागि भीम सार्कीले सर्वाधिक ४८ रन बनाए। उनले ६८ बलमा ४ चौका प्रहार गरे।
ओपनर कुशल भुर्तेल २ रनमा आउट भए। भीम सार्की र आसिफ शेखले दोस्रो विकेटका लागि ७४ रनको साझेदारी गरे, तर आसिफ ३४ रनमा रनआउट भएपछि नेपालले लय गुमायो।

कप्तान रोहित पौडेल २ रनमा पेभेलियन फर्किए, जबकि दीपेन्द्र सिंह ऐरी र आरिफ शेख केही समय टिके। अन्त्यतिर कुशल मल्लले ४५ रनको योगदान दिए भने सन्दीप लामिछाने १५ रनमा अविजित रहे।

यूएईका बलिङतर्फ जुनैद सिद्धकी, ध्रुव परासर र मुहम्मद जवादुल्लाहले समान २–२ विकेट लिए, जबकि जाहिद अलिले १ विकेट हात पारे।