सिमरा पब्लिक र मिसन एकेडेमीले उचाल्यो सिमरा–डुमरवाना अन्तरविद्यालय फुटबलको उपाधि
सिमराः सिमरामा सम्पन्न सिमरा–डुमरवाना अन्तरविद्यालय फुटबल प्रतियोगितामा सिमरा पब्लिक इङ्लिस स्कुल र मिसन एकेडेमीले उपाधि आफ्नो नाम गरेका छन्।
सिमरा रंगशालामा बुधबार सम्पन्न फाइनल खेलमा सिनियरतर्फ सिमरा पब्लिकले मिसन एकेडेमीलाई १–० ले पराजित गर्दै उपाधि जित्यो। टिमका कप्तान सुमन साहले निर्णायक गोल गरेका थिए।
जुनियरतर्फ भने मिसन एकेडेमीले स्नो एपेक्स एकेडेमीलाई २–० ले हराउँदै उपाधि हात पारे। मिसनका राजदीप धामी र सन्देश चौधरीले गोल गरेका थिए।
प्रतियोगिताको उत्कृष्ट खेलाडी (एमभीपी) सिनियरतर्फ सिमरा पब्लिकका सुजन घलान र जुनियरतर्फ मिसन एकेडेमीका राजदीप धामी घोषित भए।
सर्वाधिक गोलकर्ता सिनियरतर्फ चार गोलका साथ सिमरा पब्लिकका कप्तान सुमन साह बने भने जुनियरतर्फ स्नो एपेक्सका रोशन साहले पाँच गोल गर्दै शीर्ष स्थान पाए।
उत्कृष्ट गोलरक्षकको उपाधि सिनियरतर्फ सिमरा पब्लिकका मनिष खनाल र जुनियरतर्फ पाथीभरा इङ्लिस एकेडेमीका विश्वास पराजुलीले हात पारे।
फाइनल खेलका ‘प्लेयर अफ द म्याच’ सिनियर समूहमा मिसन एकेडेमीका प्रिन्स थापामगर र जुनियर समूहमा मिसन एकेडेमीकै सन्देश यादव घोषित भए।
विजेता तथा उपविजेतालाई बारा जिल्ला फुटबल संघका अध्यक्ष रामचन्द्र लामा, सिमरा कलेजका सहप्राध्यापक शालिकराम अधिकारी, एकता स्कुलका प्रधानाध्यापक मदन रिजाल, तथा सिमरा–डुमरवाना हबका संयोजक बसन्त ढकाललगायतले पुरस्कार वितरण गरेका थिए।
सिमरा–डुमरवाना हबद्वारा आयोजित प्रतियोगितामा १२ विद्यालयको सहभागिता रहेको थियो। सिमरा तथा डुमरवाना क्षेत्रका १२ निजी विद्यालयले हब गठन गरी खेलकुद तथा शैक्षिक क्षेत्रमा निरन्तर रचनात्मक गतिविधि गर्दै आएका छन्।