अक्षरा महिला क्रिकेटको उपाधिका लागि एसपीईएस र अक्षरा भिड्ने
सिमरा: जीतपुरसिमरा उपमहानगरपालिका ४ औराहस्थित सेज क्रिकेट मैदानमा जारी प्रथम अक्षरा अन्तरविद्यालय महिला क्रिकेट प्रतियोगितामा आयोजक अक्षरा पाठशाला र सिमरा पब्लिक इङ्लिस स्कुल (एसपीईएस) उपाधिका लागि भिड्ने भएका छन्। शुक्रबार सम्पन्न सेमिफाइनल खेलहरूमा जित दर्ता गर्दै दुबै टोली फाइनलमा प्रवेश गरेका हुन्।
अक्षराले एक्स सर्भिसम्यान चिल्ड्रेन एकेडेमीलाई ६ रनले पराजित गर्दै फाइनल यात्रा तय गर्यो। टस हारेर ब्याटिङमा उत्रिएको अक्षराले १० ओभरमा २ विकेट गुमाउँदै ७२ रन जोड्यो। उसका लागि आर्या विकले दमदार प्रदर्शन गर्दै सर्वाधिक ३२ रन बनाइन। एक्स सर्भिसम्यानका रितिका श्रेष्ठ र अनुष्का ढकालले समान एक/एक विकेट लिए।
७३ रनको लक्ष्य पछ्याउन मैदानमा उत्रिएको एक्स सर्भिसम्यानले ३ विकेटको क्षतिमा ६६ रन मात्र बनाउन सक्यो। उसका लागि अनु वाइवा १८ र रितिका श्रेष्ठ १६ रन जोड्दा अन्य ब्याटर चल्न सकेनन् । अक्षराका प्रिन्सा पौडेलले २ विकेट हात पारिन्। आर्या विक ‘प्लेयर अफ दि म्याच’ घोषित भइन्।
दोस्रो सेमिफाइनलमा एसपीईएसले पाथीभरा इङ्लिस स्कुललाई २८ रनले हराउँदै फाइनलमा स्थान बनायो। टस जितेर पहिला ब्याटिङ गरेको एसपीईएसले १० ओभरमा पाँच विकेट गुमाउँदै ७४ रनको योगफल बनायो। उसका लागि विनिशा लामिछाने २९ र अनुष्का कार्की १५ रनका साथ शीर्ष स्कोरर बने। पाथीभराका लागि मनुजा खड्काले दुई र एन्जल पराजुलीले एक विकेट लिए ।
७५ रनको लक्ष्य पछ्याउने क्रममा पाथीभराले निर्धारित ओभरमा पाँच विकेट गुमाई ४६ रन मात्रै बनाउन सक्यो। मनुजा खडकाले १४ रन जुटाइन। बलिङतर्फ एसपीईएसकी विनिशा लामिछाने र हिमा भट्टराईले एक/एक विकेट हात पारे। विनिशा ‘प्लेयर अफ दि म्याच’ घोषित भइन्।
अब उपाधिका लागि शनिबार बिहान १० बजेपछि अक्षरा र एसपीईएसबीच फाइनल खेल हुनेछ। अक्षरा पाठशालाको आयोजनामा भैरहेको प्रतियोगितामा १० टोलीको सहभागिता रहेको थियो ।