अक्षरा महिला क्रिकेट: सिमरा पब्लिक, एक्स सर्भिसम्यान र पाथीभरा विजयी

अक्षरा महिला क्रिकेट: सिमरा पब्लिक, एक्स सर्भिसम्यान र पाथीभरा विजयी

सिमराः बाराको सिमरामा जारी प्रथम अक्षरा अन्तरविद्यालय महिला क्रिकेट प्रतियोगिता अन्तर्गत बुधबार तीन खेल सम्पन्न भएका छन्। औराहस्थित सेज क्रिकेट मैदानमा भएका खेलहरूमा सिमरा पब्लिक इङ्लिस स्कुल, एक्स सर्भिसम्यान चिल्ड्रेन एकेडेमी र पाथीभरा इङ्लिस बोर्डिङ स्कुलले विजय हात पारेका हुन्।

पहिलो खेलमा सिमरा पब्लिक इङ्लिस स्कुलले लोटस एकेडेमीलाई ८ रनले पराजित गर्‍यो। टस हारेर ब्याटिङको निम्तो पाएको सिमरा पब्लिकले निर्धारित १० ओभरमा दुई विकेट गुमाउँदै ७४ रन जोड्यो। जवाफी ब्याटिङमा उत्रिएको लोटस एकेडेमीले १० ओभरमा चार विकेट गुमाएर ६६ रन मात्र बनाउन सक्यो। खेलकी प्लेयर अफ दि म्याच सिमरा पब्लिककी विनिशा लामिछाने घोषित भइन्।

दोस्रो खेलमा एक्स सर्भिसम्यान चिल्ड्रेन एकेडेमीले एकता स्कुललाई १३ रनले पराजित गर्‍यो। टस हारेर ब्याटिङ गरेको एक्स सर्भिसम्यानले १० ओभरमा पाँच विकेट गुमाउँदै ७७ रन बनायो। एक्स सर्भिसम्यानका लागि आइरिष घलेले २५ तथा अनु वाईवाले १७ रन योगदान दिइन्। जवाफी ब्याटिङमा उत्रिएको एकता स्कुल १० ओभरमा ६ विकेट गुमाएर ६४ रनमै सीमित रह्यो। खेलकी प्लेयर अफ दि म्याच एक्स सर्भिसम्यानकी आइरिष घले घोषित भइन्।

तेस्रो खेलमा पाथीभरा इङ्लिस बोर्डिङ स्कुलले सेन्ट जोन्स स्कुललाई ९ विकेटले पराजित गर्‍यो। टस हारेर ब्याटिङ गरेको सेन्ट जोन्सले १० ओभरमा ८ विकेट गुमाउँदै ४१ रन बनायो। जवाफी ब्याटिङमा उत्रिएको पाथीभराले मात्र एक विकेट गुमाउँदै सहज रूपमा लक्ष्य पुरा गर्‍यो। खेलकी प्लेयर अफ दि म्याच पाथीभराकी मनुजा खड्का घोषित भइन्।

सिमरास्थित अक्षरा पाठशालाको आयोजनामा भइरहेको प्रतियोगितामा कुल १० विद्यालयको सहभागिता रहेको छ।