वर्षाले खोस्यो नेपालको सेमिफाइनल सपना
नागोया (जापान): जापानमा जारी २०औं एसियन गेम्स अन्तर्गत पुरुष क्रिकेटको क्वाटरफाइनल खेलमा वर्षा बाधक बनेपछि नेपाली टोलीको यात्रा अन्तिम आठमै सीमित भएको छ । मंगलबार नेपाल र श्रीलंकाबीच हुनुपर्ने क्वाटरफाइनल खेल लगातारको वर्षाका कारण एक बल पनि नफाली रद्द भएको हो ।
खेल रद्द भएसँगै अन्तर्राष्ट्रिय क्रिकेट परिषद् (आईसीसी) को वरीयताका आधारमा श्रीलंका सेमिफाइनलमा प्रवेश गरेको छ । समूह चरणमा अफगानिस्तानलाई हराउँदै र जापानसँगको खेल वर्षाले प्रभावित भएपछि अंक बाँड्दै उत्कृष्ट प्रदर्शनका साथ नेपाल क्वाटरफाइनल पुगेको थियो । तर नकआउट चरणको निर्णायक खेलमा वर्षाका कारण खेल्ने अवसर नै नपाई नेपाल बाहिरिन पुग्यो ।
यसअघि सोमबार तय गरिएका दुवै क्वाटरफाइनल खेलहरू पनि वर्षाकै कारण रद्द भएका थिए । ती खेलहरू पनि रद्द भएपछि आईसीसी वरीयताका आधारमा भारत र पाकिस्तानले सेमिफाइनलमा स्थान सुरक्षित गरेका थिए ।