एन्फा प्रेसिडेन्ट लिगमा नव जनजागृति सिमराको पहिलो जित

हेटौंडा: एन्फा प्रेसिडेन्ट लिग फुटबल प्रतियोगितामा नव जनजागृति युवा क्लब सिमराले पहिलो जित दर्ता गरेको छ। हेटौंडाको गौरीटार रंगशालामा सोमबार भएको खेलमा सिमराले गाईघाट फुटबल क्लबलाई २–० ले पराजित गर्दै तीन अंक जोडेको हो।

सिमराका रुजन न्यौपाने र विकास दर्लामी मगरले गोल गर्दै टोलीलाई जित दिलाए। खेलमा उत्कृष्ट प्रदर्शन गरेका नव जनजागृति युवा क्लबका अभिनाश स्याङतान ‘प्लेयर अफ द म्याच’ घोषित भए। उनले पाँच हजार रुपैयाँ नगद पुरस्कार प्राप्त गरे।

लिगको पहिलो खेलमा काक्रे बिहार युवा क्लब सुर्खेतसँग १–१ को बराबरी खेलेको नव जनजागृतिले दोस्रो खेलमै जित निकाल्दै आत्मविश्वास बढाएको हो।

अखिल नेपाल फुटबल संघ (एन्फा) द्वारा आयोजित प्रेसिडेन्ट लिगमा देशभरका जिल्ला र प्रदेश लिगका च्याम्पियनसहित १० टोलीको सहभागिता छ। लिगका शीर्ष चार टोली सेमिफाइनलमा प्रवेश गर्नेछन्, जसबाट राष्ट्रिय लिगका लागि टिम छनोट गरिनेछ।

प्रतियोगिता मंसिर २ गतेसम्म हेटौंडामा सञ्चालन हुनेछ।