अष्ट्रेलियाको जहाज छोडेर फर्किएका नन्दनको नयाँ उडान

सिमराः आईसीसी विश्वकप लिग २ त्रिकोणात्मक सिरिजबाट नेपालका लागि ४२औं एकदिवसीय क्याप लगाउँदै डेब्यु गरेका नन्दन यादव यतिबेला चर्चामा छन् । स्कटल्याण्डको डुण्डीमा नेदरल्याण्डविरुद्ध महत्वपूर्ण तीन विकेट लिँदै २६ वर्षीय नन्दनले मंगलबार शानदार डेब्यु गरे ।

नन्दनको डेब्यु खेल सबैका लागि अविस्मरणीय रहने निश्चित नै छ । उनको प्रदर्शनको मद्यतबाट नेपालले नेदरल्याण्डलाई १६ रनले पराजित गर्दै महत्वपूर्ण जित हात पारेको छ । उक्त लिगमा नेपालको यो तेस्रो र नेदरल्याण्डविरुद्धको दोस्रो जित थियो ।
सिनियर खेलाडी घाइते भएपछि अवसर पाएका नन्दनले आफ्नो क्षमता प्रदर्शन गर्ने मौका समेत पाए । यो नन्दनका लागि सुखद् अवसर पनि हो । नेपालको जर्सीमा एकदिवसीय खेल खेल्ने सपना पनि नन्दनले पूरा गरेका छन् ।

पाँच महिनाअघि नेपालबाट अष्ट्रेलिया फर्कन लागेका उनी यही सपना पूरा गर्ने अठोटका साथ त्रिभूवन अन्तर्राष्ट्रिय विमानस्थलबाट घर फर्किएका थिए । विमानस्थलमा बोडिङ गरेर अष्ट्रेलियाको जहाज पर्खिरहेका नन्दनले अचानक आफ्नो निर्णय बद्लिएका थिए । यो निर्णय लिन उनलाई सहज थिएन । तर अभिभावकले पनि साथ दिए ।

अष्ट्रेलियामा तीन वर्षदेखि व्यवसायिक क्रिकेट खेल्दै आएका नन्दन नेपाल प्रिमियर लिग (एनपीएल) खेल्न स्वदेश फर्किएका थिए । उनी कर्णाली याक्ससंग ११ लाखमा अनुबन्धित भएका थिए । एनपीएल खेलेर नन्दनको माघ ४ गते अष्ट्रेलिया फर्कने तालिका थियो ।

अष्ट्रेलियामा उनको आम्दानी पनि राम्रै थियो । पारिवारिक स्रोतका अनुसार प्रति सिजन उनले ६ हजार पाँच सय अष्ट्रेलियन डलर पाउँथे । त्यसबाहेक फुर्सदको समयमा काम गर्थे भने साना बालबालिकालाई क्रिकेट सिकाउथे । त्यसबाट पनि उनको आम्दानी हुन्थ्यो । नेपालबाट क्रिकेट खेल्ने इच्छा हुँदाहुँदै पनि अवसर नपाएर र आर्थिकरुपमा सबल बन्न अष्ट्रेलिया फर्कनुपर्ने उनको बाध्यता थियो ।

विमानस्थल जानुअघि नन्दनले सिरहामा रहेकी आमा समिरालाई फोन गरेर आफू अष्ट्रेलिया फर्कन लागेको जानकारी गराउँदै बिदा लिए । उनि सबै तयारीसहित विमानस्थल पुगेका थिए । विमानस्थल भित्र बोडिङ र लगेज चेकिङ गरेर उनि विमानको पर्खाइमा थिए । तर अचानक नन्दनको मन फेरियो ।